"آخدی گؤزلریمدن سئل گیزلی-گیزلی" ب. آذراوغلو
سهند! محرابیمیز آنا وطندیر.
محرابین باشینا دؤن، آشکار-آشکار.
آرزو چلنگیمی دان شفقیندن
هؤرورم، قارداشیم، من آشکار-آشکار.
دئییرلر: "صبر ائدین، سوسون، گؤزلهیین". –
نئجه قؽشقیرماییم، - نئجه؟ بیر دئیین.
سؽخیر بدنیمی بو کور فلکین
اینیمه بیچدیگی دون آشکار-آشکار.
منی قورخوتماییر قارا گئجهلر،
ظۆلمتین تشویشی هدردیر، هدر.
گئجهنین باغریندان دوغولور سحر،
قؽزاریر اۆفوقده دان آشکار-آشکار.
بابا کؤلگهسینه دالدالانمایاق،
کۆل اولوب کۆل اۆسته بیز قالانمایاق.
چیلله قوشو کیمی گیزلی یانمایاق،
اودوندان اود آلیم، یان، آشکار-آشکار.
حاقیمی تاپدایان منی نه آنلار؟
حاقیمدان دانیشیر حاقی دانانلار.
بئله ده درد اولار، سیز ای قانانلار،
آغلا گیزلی-گیزلی، قان، آشکار-آشکار؟
کنده سس دۆشمهسه ایتلر هۆروشمز،
کؤنول ایستهمهسه اللر گؤروشمز.
بیر آددیم قاباغا ایشیغی دۆشمز،
ایچیندن یانماسا، جان آشکار-آشکار.
اومور سحرینی او یازیق وطن
بیزیم قلبیمیزین اؤز آتشیندن.
بئله گلیشینی ایستهمیرم من،
گلهسن، گئدهسن سن، آشکار-آشکار.