نه سن گۆلسن، نه من بۆلبول

بیر قؽز قارلی قؽش گۆنونده
دیبچکده بیر گۆل بیتیردی.
قؽش فصلینده گۆله باخیب
اۆرگینه یاز گتیردی.

بو گۆل، اصل قؽزیل‌گولدو –
لچکلری واراق-واراق.
تیکانی بول، رنگی قؽزیل،
عطری یوخدو اونون آنجاق.

قونشولوقدا بیر اوغلانین
قفسده بۆلبولو واردی.
اوغلان اونون نغمه‌سیله
دردلرینی اوووداردی.

نه اولدوسا... اوخومادی،
سوسدو بۆلبول بیردن-بیره.
اوغلان دۆشدو مین فیکیره.
قونشوداکی قؽزیل‌گولدن
خبر توتدو اوغلان بیر گۆن.
بۆلبولونو او گتیریب
قنشرینه قویدو گۆلون.

گۆل، بۆلبولو گؤرن کیمی،
سؽغاللاندی،
تومارلاندی.
گؤزلرینه ناز-غمزه‌دن
سۆرمه چکیب خومارلاندی...

اوخومادی بۆلبول یئنه
سوسوب دوردو، لال کسیلدی
بو حال گۆله آجیق گلدی.
گۆل داها دا شیوه‌لندی،
سوسوب دوردو بۆلبول یئنه
حسرت قالدی بو دار قفس
نغمکارین نغمه‌سینه.

بو عینادی گؤرونجه گۆل،
رنگی سولدو،
خزان اولدو
یوماق کیمی تئز یومولدو.

یاواش-یاواش دیله گلدی
بو دم بۆلبول
دئدی: - ای گۆل،
منی تانی،
اۆرگیمده غم کاروانی،
سن گۆلسنسه، عطرین هانی؟
دئمه سوسوب ندن بۆلبول؟
یازیم دؤنوب سازاق اولوب
کؤکسوم باشی داغ-داغ اولوب
وطنینده دوستاق اولوب
چوخ دئسه ده، "وطن"، بۆلبول.
دیبچکده‌سن، قفسده‌یم.
سن علاجسیز، من خسته‌یم.
ایندی اؤزگه هوسده‌یم،
-آغلار زدن-زدن بۆلبول.
زامان بیزدن کام آلیبدیر،
داها اۆرک قوجالیبدیر. بیزدن آنجاق آد قالیبدیر،
نه سن گۆلسن، نه من بۆلبول.