کاروسئل

فؽرلانیر کاروسئل بیر تکر کیمی.
دایما فؽرلانان، دؤنن یئر کیمی.
فؽرلانیر اوشاقلار دسته‌به‌دسته.
کیمی "آت" بئلینده، کیمی "فیل" اۆستده.

کاروسئل فؽرلانیر... اؤتور خوش آنلار.
اوشاقلار ال چالیر شادلیقلاریندان.
اوشاقلار ظنّ ائدیر، دایانیب اونلار،
آنجاق باشلارینا دولانیر جاهان.

سئوینین، اوشاقلار، گۆلون، ایله‌نین.
کاروسئل دولانیر،
دگیشیر زامان.
هله‌لیک جاهانین باشینا سیز یوخ،
سیزین باشینیزا دولانیر جاهان.

سئوینین، اوشاقلار، عؤمور گؤدکدیر،
حیات تومارلاییر، اوخشاییر سیزی.
هله‌لیک دۆنیا دا گؤتوره‌جکدیر
سیزین نازینیزی، شؽلتاغینیزی.

کاروسئل فؽرلانیر... بیر دسته دوما
سانکی دؤوره ووروب صفه دۆزولور.
آتالار، آنالار اوشاقلاری‌نین
باخیب سئوینجینه سئوینیر، گۆلور.

بۆتون بو شنلیکدن اوزاقدا آنجاق
بارماغی آغزیندا دوروب بیر اوشاق.

اوشاقلار فؽرلانیر... باخیر اونلارا
او گۆلور... اونون دا دگیشیر حالی.
اوزاقدان باخدیقجا فؽرلانانلارا
فؽرلانیر اونون دا فیکری، خیالی.
او دا خوشحاللانیر، حظّ آلیر گئندن.
دویور فؽرلانماغین خوش اولدوغونو،
اوشاق مئیدانچایا تک گلدیگیندن
یوخدور کاروسئله میندیرن اونو.

آنجاق او خوشبختدیر...
او قلبه من ده
حئیرانام...
ای کؤنول،
دۆشون، دۆشون سن.
او، حظّ آلا بیلیر اؤزگه‌سی‌نین ده
حظّیندن، ذؤقوندن، سعادتیندن!...