ابدی بیر اود کیمی اؤز ایچیندن کؤزریب
هئی یانیر شعریم منیم.
بو گۆنومدن صاباحا
بویلانیر شعریم منیم.
گزیب دیلده، دوداقدا،
اوچور، اوچور همیشه اؤزومدن ده قاباقدا.
ایدراکیمین گؤزلری،
عقیدهمین ان تمیز، ان معنالی سؤزلری،
دویان اۆرگی شعریم،
بۆتون دیلکلریمین ان صاف دیلگی شعریم.
سن آیین، اولدوزلارین نوروندان یوغرولموسان،
باتان گئجهلریمین آچیلان سحرلره
سلامی سن اولموسان.
ایسترم سطیرلرین بو گۆنومدن سس آلان
عکس-صدایا دؤنسون.
عصریمیزین نبضی ده آهنگینده دؤیونسون.
ایستهمیرم کی، شعریم نرمه-نازیک قؽزلارین
ساچیندا عطیر اولسون.
ایسترم گۆن آلتیندا پامبیق یؽغان قؽزلارین
باشیندا چتیر اولسون.
جان وئرمه هر اؤترگی درد-غمه، شعریم منیم،
ازمه-بۆزمه گؤزهله بنزهمه، شعریم منیم.
سن آتش اول، سن اود اول،
یاندیر دا سن، یاخ دا سن.
ایلدیریم اول، چاخ دا سن.
گؤستر اؤز ایشیغیندا بو دۆنیایا اؤزونو،
بیر آن یومما گؤزونو،
هم گؤر سن، هم ده گؤستر!
فرحلری فرحده، غمی ده غمده گؤستر.
دئمیرم کی، ذرّهنی گئنیش کۆرهده گؤستر.
قۆدرتین وارسا سنین،
سن بو بویدا کۆرهنی کیچیک ذرّهده گؤستر.
سن دۆشون درین-درین، دۆشوندور درین-درین،
وطنینی، ائلینی دانان طۆفئیلیلرین
وطنچین یوخ،
ماناتچین یانان طۆفئیلیلرین
یومروغا دؤن باشیندا.
کئشیکچی اول بو یوردون تورپاغیندا، داشیندا.
وۆقاری اول، عزمی اول اگیلمهین باشلارین،
قلبینده مرمییه دؤن اصل وطنداشلارین.
سونسوز دۆشونجهلریم،
بو دۆنیایا سوالیم،
هر ایستهییم، خیالیم،
عشقیم، حسرتیم منیم،
ایلک محبّتیم منیم،
حدسیز شادلیغیم منیم،
بو دۆنیادا ابدی ناراحاتلیغیم منیم.
سنه قوربان وئرمگه بیر عؤمور چوخ آزدیر، آز.
یالنیز بیرجه گۆنومون سونسوز هیجانینی
نغمهیه چئویرمگه اون عؤمور ده چاتیشماز.
من سنینچین،
آنامسا منیمچین یاندی، شعریم.
"بالامین راحتلیغی یوخدور" - دئیه او منی
سنه قؽسقاندی، شعریم.
آنجاق او بیلمهدی کی، من آنامدان دوغولدوم،
سنسه منیم قلبیمده بالامتک بسلهدیگیم
دویغولاردان دوغولدون.
منی آنامدان آلیب وطنیمه، خالقیما
اوغول ائدن سن اولدون!