یئردن آلیب اؤز گۆجونو
قالخار گؤیه طیّارهلر،
محل قویماز
نه یاغیشا،
نه کۆلگه
طیّارهلر.
اوچوشو دا عظمتلی،
دوروشو دا عظمتلی...
آشیب-داشار
طیّارهلر.
یئرده دئییل،
گؤیده یاشار
طیّارهلر.
سرنیشینه
وۆقاریندان - وۆقار وئریر
طیّارهلر،
گۆنلرین یوخ،
ساعتلارین آز عؤمرونده
قۆطبلری بیرلشدیریر
طیّارهلر.
گئجه گئدیر،
گۆندوز گئدیر
طیّارهلر.
مقصدینه،
منزیلینه دۆمدوز گئدیر
طیّارهلر.
ائنیش بیلمز،
یوخوش بیلمز،
دولای بیلمز
طیّارهلر.
نه بورولماز،
نه اگیلمز طیّارهلر.
ایچریدن آلیشماسا
بو سۆرعتله،
بو جۆرأتله
گئده بیلمز
طیّارهلر.
اؤزو کیمی
اؤلومو ده مردانهدیر.
منزیلینه اوچا-اوچا،
قاچا-قاچا
اؤز ایچیندن تئز اۆزولر
طیّارهلر.
یاواش-یاواش اؤله بیلمز.
اؤلنده ده بیردن اؤلر
طیّارهلر.