شاعیره هئیکللر قویولان زامان،
دئییرلر، اونا باخ، نه بختورمیش.
آنجاق دئمیرلر کی، من یاشاییرکن،
او اؤز سینهسینی ماسایا گرمیش.
او کئچیب جانیندان عؤمره قؽیاندا
سنین نشئهلرین آشیب-داشیردی.
او کی یاشامیردی، سن یاشایاندا
سنین یئرینه ده او آلیشیردی.
دریانین دیبیندن چؽخمامیش هله
تانیماق اولماییر مرجانی، دۆرّو.
سن حسد آپارما او داش هئیکله
عؤموردن سونرادیر اونلارین عؤمرو.
شاعیرلر، شاعیرلر، بیرجه سؤز اۆسته
صۆبحهدک یاخدینیز اۆریینیزی.
سیزی گؤرمهدیلر هئچ واخت دیز اۆسته -
غریبه یارادیب طبیعت سیزی!
هامیدان گئج یاتیب قالخدینیز ائرکن
آغاردی دان یئری گؤزلرینیزده.
مین عذاب چکدینیز سیز یاشاییرکن
اؤلوب یاشادینیز سؤزلرینیزده.
زاماندان-زامانا عقیدهنیزی
کئچیریب یاشاتدی نغمهلرینیز؛
عادی بیر اوشاق دا آلدادار سیزی –
خیال دۆنیاسیندا یاشادینیز سیز.
بیر کام آلمادینیز سیز کی، دویونجا،
سیزه خوشبخت دئین تانیمیر سیزی.
هئچ کس چکه بیلمز عؤمرو بویونجا
سیزین بیرجه گۆنده چکدیگینیزی.
دۆنیانین الیندن داد چکن زامان
خیال کؤلگهسینده دالدالاندینیز.
شاهلارین، چارلارین سارایلاریندان
آلچاق داخمالاری اوجا ساندینیز.
اؤلومدن، سۆرگوندن قورخماییب اصلا
یانیب اؤزونوزو اودا آتدینیز.
اۆرک قاریمیزلا، آمالینیزلا
زیندانلار کۆنجونده سؤز یاراتدینیز.
تعقیبله گلدینیز دایم دؤش-دؤشه
یولونوز حاق یولو، حقیقت یولو.
بو دا غریبهدیر، سیزین همیشه
جیبینیز بوش اولدو، قلبینیز دولو.
سؤزونوز، قصدینیز چؽخدی سؽناقدان
اؤتوب حاق نغمهسی، حاق اولدونوز سیز.
یاشاماق نامینه کئچمهییب حاقدان،
"انا-الحق" سؤیلهییب سویولدونوز سیز.
لاغ ائدیب گۆلنده حاقا یالانلار،
سیز ده زمانهیه، دؤوره گۆلدونوز.
گاه گیزلی-خلوتی، گاه آچیق-آشکار،
گاه دا دوئللرده اؤلدورولدونوز.
دۆنیانی گزدینیز سیز اویماق-اویماق،
فرحین ایچینده غم گؤردونوز سیز.
عادی بیر میلچگه قؽیماییب، آنجاق
بعضاً اؤزونوزو اؤلدوردونوز سیز.
سیزیندیر دۆنیانین سینه داغلاری
بو داغلار ایچینده کاما چاتدینیز.
سیز هئی یانا-یانا، قارانلیقلاری
کؤنول آتشیله ایشیقلاتدینیز.
ظالیم ظۆلمونده ده ناشیدیر، ناشی،
آخی، عذابدان دا ذؤق آلدینیز سیز.
ظالیملر، جاهیللر هر آددیمباشی
سیزی آلچالتدیقجا اوجالدینیز سیز.
سانمایین اؤزومو سانیرام یقین
بئله شاعیرلرین جرگهسینده...
یوخ! آخی، منیم کیمی شاعیرجیکلرین
ایلهامی آز اولور، ایدعاسی چوخ!
شاعیر - فیکیرلرین چؽرپینان سئلی،
شاعیر - حقیقتین مۆغنّیسیدیر.
شاعیر - طبیعتین دانیشان دیلی،
شاعیر - جمعیتین عۆصیان سسیدیر.
شاعیر - زمانهنین، عصرین ویجدانی،
شاعیر - تاریخلرین شرفی، شانی،
شاعیر - بو دۆنیایا زامانین سؤزو،
شاعیر - حقیقتین، حاقین گۆزگوسو!
بۆتون میلّتلری سیز آنلارسینیز –
سئون ده سیزسینیز قلباً اونلاری.
وطنه گلینجه، مجنونلارسینیز –
وطن مجنونلاری، ائل مجنونلاری.
مجنونلوق گؤزلدیر! "بو نهدیر؟" - دئیه
هر جاهیل آنلاماز بو اۆلویتی،
یازیق او کسه کی، یوخدور بیر شئیه
نه سونسوز نیفرتی، نه محبّتی!
یوخدور بئلهسینین آمالی، یولو،
قلبی احتیاطدان چیلیک-چیلیکدیر.
دۆشمنین نیفرتی دئییل قورخولو،
دوستون سویوقلوغو دۆشمنچیلیکدیر.
بعضاً یؽخیلدینیز آنجاق چلیکدن،
کؤمک اوممادینیز آغیر گۆنده ده.
همیشه قاچدینیز بیگانهلیکدن،
اۆرکله اؤلدونوز سیز اؤلنده ده.