منیم قانادلاریم وار:
شیرین-شیرین آرزولار،
بؤیوک-بؤیوک خیاللار
قانادلاریمدیر منیم!..
دۆنیا - قانادلاریمچین
چوخ کیچیکدیر، کیچیکدیر،
کایناتدیر - وطنیم!..
آرزولار دۆنیاسینا
اوچان زامان عاقیللار
یاراندی افسانهلر،
اساتیرلر، ناغیللار...
اوچورام، هئی!.. اوچورام!..
من تپه، دۆز بیلمیرم.
گئجه، گۆندوز بیلمیرم!
خیالین بیر حۆدودو،
خیالین بیر حدی یوخ!
گؤیلرین سرحدّی یوخ!
قوشلار نیه آزاددیر؟
آزادلیغین تشبیهی،
یاشاییر قوش آدیندا.
آزادلیق اوچور، اوچور،
قوشون سرحد بیلمهین
او قوشا قانادیندا.
فیکرین قانادلاری دا آزاددیر!..
سرحدّی یوخ!
سما کیمی حدی یوخ!..
فیکیرده مین حال اولور.
بعضاً سمانین اؤزو
فیکره داریسقال اولور!
اوچور، اوچور خیاللار،
سمادان دا او یانا.
بوشلوقدا منزیلمی وار –
اوردا فیکرین قانادی،
قرار توتوب دایانا؟..
نه قدر ایستهییرسن باخ!
اۆزومه باخ! نه غم!
مندن چوخ-چوخ بؤیوکدور
آیاقلاری باشیمدا
باشی، سونسوز سمادا
سۆزن فیکریم، دۆشونجهم!..
من آزادام، آزادام!
منزیلی گؤرونمهین
بیر ابدی یولوم وار.
منی یئردن قالدیران،
حدی، حۆدودو قؽران
فیکیر قانادلاریم وار.