بولودلار نه یامان گؤزل اولورموش

کومامیز مئشه‌نین قالین یئرینده،
داغدا سلاملاردی هر گۆنو بابام.
اودون داشیمادی، چیینلرینده
داشیدی حیاتین یۆکونو بابام.

سکسن ایل، عؤمرونون هر بیر آنیندا
غمی شربت کیمی ایچردی بابام.
عؤمرونون تارلاسینا غم کوتانیندا
همیشه گۆل اکدی، وای دردی بابام.

آنجاق داریلمادی، چالیشدی یئنه،
دردی، تاباقلادی، دردی اۆیوتدو.
قاتلاشیب دۆنیانین هر مؤحنتینه
یئددی لای دیوارلی اوغول بؤیوتدو.

دئدی، شرفیدیر هر کسین آدی –
یاشا گۆله-گۆله، اؤل گۆله-گۆله.
یئددی ترلانینا او، ال آچمادی،
اؤلونجه یاشادی اؤز امگیله.

دینمزجه دولاشدی بیر گۆن او، کندی،
گلیب یاتاغینا گیردی ناگاهان.
عؤمرونده بیر دفعه او خسته‌لندی،
همن آزارلا دا کؤچدو دۆنیادان.

یاتدی اۆزو اۆسته، یاتدی ایکی آی،
دینمه‌دی.
نه‌یسه آندی و یاندی.
نهایت چؤللره دۆشدو ها-هارای،
یازین نغمه‌سینه کیشی اوینادی.

دئدی، چؤلده سالین یئریمی، چؤلده،
سون دفعه سئیر ائدیم چؤلو-چمنی.
گؤر نه یامان یئرده گلدی اجل ده،
آرخاسی اۆستونه چئویرین منی.
یئرینی سالدیلار گؤی چمن اۆسته.
اوزاندی، دریندن کؤکس اؤتوره‌رک.
گؤیده آغ بولودلار دسته‌به‌دسته،
یئرده باده توتان گۆل لچک-لچک.

اۆفوقده یاناردی بولودلار پار-پار،
او باخدی گؤیلره... آخشام چاغیندا. –
من ایندی گؤرورم، - دئدی - بولودلار
نه گؤزل اولورموش گؤیون تاغیندا.

بابام نیه باخدی گؤیه سون کره؟
گئتدی داماغیندا دۆنیانین دادی.
سکسن ایل یاشادی،
آنجاق گؤیلره
دویونجا باخماغا ماجال تاپمادی.