انسان اولماسان

انسان اوغلو آدین انسان قویوبسان
آدین هئچ‌دی اؤزون انسان اولماسان
دوقتوراسان صاحب مدرک اولوبسان
مدرک هئچ‌دی اؤزون انسان اولماسان
انسان اودور انسانليغین دوشونه
فکر ائله‌یه یارادانین ایشینه
دانیشاندا سؤزون سالا کشینه
سؤز ده هئچ‌دی اؤزون انسان اولماسان
ثروته سئوینمه ائل آپاراجاق
مقاما گووه‌نمه یئل آپاراجاق
عؤمرون سارایلارین سئل آپاراجاق
سارای هئچ‌دی اؤزون انسان اولماسان
دده کاتب عؤمور کئچر دم به دم
انسانلیق یولوندان چیخما بیر قدم
پول انسانی انسان ائیله‌مز دده‌م
پول‌دا هئچ‌دی اؤزون انسان اولماسان