دهلی کؤنول ایشلهمهین دیشلهمز
هئچ واخت غیرت ترین تؤکنمز قارداش
بیر انسان کسی موفتهخورلوق اؤیرهنیب
گلیب ایش زحمتین چکنمز قارداش
قوردون عادتیدیر توتدوغون سؤکر
نطفهسی کج اولان ناحق قان تؤکر
قابل خیاط اؤلچو بیلر دون تیکر
پالاندوز کت - شلوار تیکنمز قارداش
الين وئرمه قودوزلارا دیشلهسین
عقرب کیمی دوست دوشمنی نیشلهسین
ایشین تاپشیر ایش بیلنه ایشلهسین
هر ترازو گوهر چکنمز قارداش
دده کاتب هجرین وصالی واردیر
هر ایشین بیر حرام - حلالی واردیر
هر مالین امکان زوالی واردیر
علم بیر ثروتدیر توکنمز قارداش.