خاین وزیرلرین پاخیللیغی

وار ایدی پادشاهین اون وزیری،
وزیرلیک مسندی‌نین مرد-پیری.
حسد علمینده عالیم، قلبی پۆرکین
خیالیندا غرض، اخلاقی چیرکین،
همیشه فیکری غئیبت، کاری بیداد،
الیندن داده گلمیش ج‍ۆمله افراد.
گؤرونجه شاه اؤنونده بختیاری،
کی، آلمیشدیر اله هر ایختیاری،
یؽغیلدی ج‍ۆمله‌سی بیر وخت-آخشام،
وئریلسین بیر خیانتچون سرانجام.
سالیب شاهین گؤزوندن اول جاوانی،
کنار ائتمک سارایدان تئز زمانی.
اولوب بو فیتنه‌ده هامی‌سی ال‌بیر،
هامان دم تؤکدولر بیر گیزلی تدبیر.
کئچر گۆنلر، کئچردی یاخشی دملر،
نه‌دیر غۆصّه، او بیلمز دردی غملر،
سارایدا خوش حیاتا دالمیش ایدی.
بیر آخشام باریگاهدا قالمیش ایدی.
هامی گئتمیش، سارایدا یوخدو بیر کس.
اولوب حئیران بو حاله نئیله‌سین بس؟
آلیب باده، ایچیب مئی، اولدو سرخوش،
آپاردی خواب-غفلت، اولدو بیهوش.
آییلدی بیر زامان کی، وخت کئچمیش،
تامام درلر قاپالی، هامی گئتمیش،
سارایدان تاپمامیشدی چؽخماغا یول،
نه ائتسین، نئیله‌سین کی، بیلمه‌دی اول.
اوتاقلاردان کئچیب دیگر اوتاغا،
تصادوف ائیله‌دی بیر شبچیراغا.
سالینمیش بیر طرفده زرلی یورغان،
گؤرونجه رخت-خوابی سرخوش اوغلان.
اویوب تأثیر-خومار-شرابه.
اوزاندی رخت-خوابه، گئتدی خوابه.
قاییتدی نیصف-شبده، شاه سارایه.
تصادوف ائیله‌دی بو ماجرایه
قالیب حئیرتده بیردن، قؽلدی فریاد.
سسینه سس وئریب توپلاندی افراد.
غضبله سؤیله‌دی شاه بختیاره:
– آییل بیر خوابیدن ای بختی قاره!
نه مقصدله ائدیب بو امره ایقدام،
منه مخصوص یئرده قؽلدین آرام؟
یقین واردیر بو ایشده بیر خیانت،
کی، وئرمیشدیر سنه بونجا جسارت!
ائدیب زنجیره محکوم اول جاوانی.
حرم‌خانه طرف اولدو روانی.
ائدیب بیدار یاتمیش گۆل‌جمالی.
اونونلا باشلادی سورغو-سوالی:
– یاتاغا یول تابیبسا گر بو میسکین،
بلدچی اولماسا گلمک نه مۆمکون؟
بو مخفی فیتنه‌دن من بدگومانم.
حرم اهلینه گلیر چۆن گۆمانیم.
سنین کؤنلوندن آلمیشسا رضانی،
حقیقت سؤیله، ایشلتمه یالانی.
بو تؤهمتدن اولوب پژمورده خاتون،
نه وجهیله ایناندیرسین ثباتین.
دئدی: – ای قیبله‌گاه‌یم، پادشاهیم!
منیم اصلا یوخومدور هئچ گۆناهیم!
قسم یاد ائیلرم، شاهین اؤنونده،
خیانتدن نۆمونه یوخ سؤزومده!..
کلامی ائتمه‌دی سولطانه تأثیر.
بویوردو بوینونا سالسینلار زنجیر.
زمانی کی، آچیلدی صبح-صادق،
اولونجا قئید-شبدن شاه فاریغ،
چؽخیب تختده اوتوردو، خئیلی غمگین،
اۆرکده درد و غۆصّه، اۆزده تمکین،
ایشاره قؽلدی گلسین ج‍ۆمله عیان،
حۆضوره داخیل اولسون، اول وزیران.
ادا اولدو چۆ رأیی پادشاهین،
آچیلدی قاپیلاری اول باریگاهین،
هامی گلدی صف-اندر-صف دایاندی،
شهین قلبی قؽزیل قانا بویاندی.
نیدا قؽلدی، دئدی: – من آزادبختین،
اولوب رۆسوا نظرده تاج و تختی.
خزینه مالیکی، اول بیدیانت،
ولی-نعمته ائتمیش خیانت،
وزیرلر هئیأتینی قؽلدی آگاه،
تماماً سرگوذشتی ائتدی ایضاح.