اۆچونجو وزیرین پادشاها عرض ائتمه‌سی

صاباح اولدو یئنه خورشید-انور،
چؽخیب دۆنیا اۆزو اولدو مۆنوّر.
وار ایدی پادشاهین بیر وزیری،
عجایب، خوردبین و دادگیری.
اونا قویموشلار ایدی آفرین نام،
مۆدبّیر، کاردان، نیکو-سرانجام.
دئدی سولطانا اول بیر نئچه سؤزلر:
کی، سولطان باغرینا یاپیشدی کؤزلر،
دئدی: ای پادشاه-نیک-فرجام!
سنین تک یوخوموش رۆسوای، بدنام.
اگر یوخدور سنین جانیندا غئیرت،
تغافول ائیله‌مه ای بی‌حمیّت!
بونو اؤلدورگینن سن، نام باده
گئدیبدیر، ساخلاما بوندان زیاده.
نه سؤیلر کیم سنه اهل-زمانه،
قولاق آسیرسان، اول سؤیلر فسانه.
گتیردیلر پس اولدم بختیاری.
کسیلمیش چاره‌سی، یوخ ایختیاری.
کی، ای بی‌آبرو، شرمنده‌ی-دون
بیزی عالمده سن رۆسوای قؽلدین!
سنین عالمده آدین ائیله‌ییم گۆم،
دخی قؽلمام سنه لۆطف و ترحّوم.