بیرینجی وزیرین پادشاها عرض ائتمه‌سی

«صاباح اولدو یئنه خورشید-انور».
«چؽخیب، دۆنیا اۆزو اولدو مۆنوّر».
صداسی گلدی یئنه اول وزیرین،
یئتیشدی خیدمتینه چۆن امیرین،
دئدی: ای پادشاه-عالم-آرا!
حرامیزاده‌یه رحم ائتمه اصلا!
فراموش ائیله‌سه کیم حق و نعمت،
عدالتدیر اونا قؽلماق سیاست.
ائشیتدی چۆن وزیرین سؤزلرینی
زیاده اولدو شاهین خیشم و کینی،
گتیرسینلر دئدی قؽلدی ایشاره،
غضبلندی دئدی اول بختیاره:
– سنه من ائیله‌دیم اعزاز و ایکرام،
منی سن ائیله‌دین رۆسوای و بدنام،
سنی ائتمک گرکدیر پاره-پاره،
سنه یوخدور اؤلومدن اؤزگه چاره.