وزیرین گۆلجماللا صؤحبتی
– قؽزیم، سؤیله نهدیر بو ماجرالر؟
سنین حاقیندا بلکه ایفتیرالر؟
چکینمه، دوغروسون سؤیله، اؤزون سن،
بو چیرکین ماجرانین لاپ دۆزون سن.
قبول ائیله نصیحت، ائیله باور،
من اوللام دار گۆنونده یار و یاور.
سنی شاهین گؤزونده ائیلهمک پاک،
بو پیرین بورجودور، گل اولما شکّاک.
بیانه گلدی اول دم پاک طینت،
دئدی: – لازیم دئییلدیر بونجا مینّت،
فساد و فیتنهیه بیگانهیم من.
گۆناهسیز محو اولان پروانهیم من!
الیمدن چؽخمامیش هئچ بیر جینایت،
دیلیمدن گؤرمهمیش کیمسه خیانت،
اگر سولطان دۆشوبدور بدگومانه،
گلر بیر گۆن سؤزون سؤیلر زمانه.
دئدی: – بونلار تمام افسانه سؤزلر،
نیجاته یوخ گۆمان، بیگانه سؤزلر.
اگر ایستر ایسن تاپماق نیجاتی،
خیلاص ائتمک خطردن سن حیاتی،
قبول ائیله سؤزوم، اولما عینادکار،
صلاح-مصلحتدیر، بؤیله رفتار.
خبر گؤندر کی، سولطان دعوت ائتسین،
سنینله بیر اوتاقدا صؤحبت ائتسین.
اونا سؤیله کی: «منده یوخدو تقصیر،
خیانت باش وئریبسه، سن مۆقصّیر.
سارایا دعوت ائتدین بختیاری،
اله آلدی او دا کۆلّی ایختیاری.
گؤروب آزاد اؤزون او، جانه گلدی.
صفای-نشئهسی طوغیانه گلدی.
منه عشق-محبّتدن دانیشدی.
وۆصالیمچون اودا یاندی، آلیشدی،
منه اعلان-عشق ائتدی بو اوغلان،
کی، ایستردی اولا تختینده سولطان.
سنی قتله جسارت ائتمیش ایدی،
بو قصد ایله سرایه گئتمیش ایدی».
وزیرین سؤزلریندن گۆلجمالین،
وۆجودی تیترهدی، اول خوش خیصالین،
دئدی: – بونلار تماماً ایفتیرادیر،
گۆناهسیز بیر اسیره نه روادیر؟
دئدی: – بونجا عیناده اولما مایل،
اولارسان بختیارلا سن ده زاییل.
عیناده اویما سن، گل اولما بدنام،
نه لازیم محو اولا سن تک گۆلاندام.
نهایت اولدو نایل مقصده اول،
تاپیب او گۆلجمالین قلبینه یول،
نه کیم، اؤیرتمیش ایدی اول سیتمکار،
گلیب خاتون حۆضوره ائتدی ایخطار.
«وزیر دئدی کی: – ای سولطان-کامیل!»
«اونون قتلینده اصلا اولما غافیل!»
«حقیقت سنه ظاهیر اولدو احوال»،
«نهدیر قؽلماق دخی تصدیق اهمال؟»
«اونا لایق یئتیشسین قوی جزایه»
«کی، عیبرت اولا هر بیر ناسزایه».
شرارت ائیلهدی سولطانه تأثیر،
دئدی: – گؤرمک گرک بو یولدا تدبیر،
سالین زیندانه، یاتسین قوی سون آخشام.
صاباح قتلی اۆچون وئررم سرانجام.
و سولطان امرینی ائدینجه ایتمام،
گۆنش باتدی و اولدو وخت-آخشام.
اونو آپاردیلار زیندانه اول دم،
یئنه باغلادیلار زنجیره مؤحکم.