چیخدی اکراه قیلیب کلبۀ احزانیمدان

فلک آییردی منی جورایله جانانیمدان،
حذر ائتمزمی عجب، ناله و افغانیمدان؟
اودا یاندیرماسا بیر شعله ایله نه فلکی،
نه بیتر آتش آه دلسوزانیمدان؟
غم پنهان منی اؤلدوردو، بو هم بیر غم کیم،
گلرخم اولمادی آگه غم پنهانیمدان.
آه ایدی همنفسیم، آه کی، اول هم آخر
چیخدی اکراه قیلیب کلبۀ احزانیمدان.
من، نه حاجت کی، قیلام داغ نهانیم شرحین؟
عاقبت ظاهر اولور چاک گریبانیمدان.
جان اگر چیخسا تنیمدن اثر مهرین ایله،
اثر مهرینی سانمان کی، چیخار جانیمدان.
لطف ائدیب سن مگر، ای باد، بو گوندن بؤیله
وئره سن بیر خبر اول سرو خرامانیمدان.
حق بیلیر، دوست دئگیل جان و دلیمدن غایب،
نولا گر غایب ایسه دیدۀ گریانیمدان.
ای فضولی، غم هجران ایله پریشان دیر حال،
کیمسه آگاه دئگیل حال پریشانیمدان.