سوز دل ایله سینه راحت اولور فزون

توپراقدن گؤتور منی، ای اشک لاله گون!
باشیمدن ائتمه ساینی کم، ای حباب خون!
ائل طعنه سیندن ایسترم اول کویه گئتمییم،
اؤز اختیاریم ایله قویما منی، ای جنون!
تسکین بولور جگرده حرارت سرشک ایله،
سوز دل ایله سینه راحت اولور فزون.
ای خون دیده، کسمه جگردن تعلقون،
مهرین ساونمه سیندن، ای آتش درون!
بیر گون بیزه سعادت وصل ائتمدین نصیب،
بیزدن گؤتور نحوستین، ای طالع زبون!
اول غمزه خنجرینه بیر اوغراتمادین بیزی،
کس بیزدن آشنالیغین، ای بخت واژگون!
ای چرخ، قیل فضولی نین آهیندان احتزاز
کیم، بیر گون ائتمه یه یئدی طاقینی سرنگون.