بخت شایسته دئگیل همتی کوتاه لره

۲۶۴ رحم ائت، ای شه، دل درویش چکن آه لره
کی، گدا آهی اثر ائدر اولور شاه لره.
مهری یوخ ماه لره آه اثر ائتمز، یا رب!
وئر بیر انصاف بو مهری یوخ اولان ماه لره.
قاشلارین طاقینه وئرسم دل سوزان، نه عجب،
رسم دیر آسیلا قندیل نظرگاه لره.
مایل سرو، قدین وصلینه یئتمز، نیشه کیم،
بخت شایسته دئگیل همتی کوتاه لره.
ساقی بزم جنون نرگس مستین دیر کیم،
ایچیریر بادۀ دل غفلت دل آگاه لره.
باخما، ای دیده، زنخدانینا محبوب لرین،
گزمه غافل، حذر ائت دوشمه یه سن چاه لره.
ای فضولی، ورع اهلی ره مسجد توتموش،
سن ره میکده توت، اویما بو گمراه لره.