دئمه، زاهد کی، ترک ائت سیمبر بت لر تماشاسین

کرم قیل، کسمه، ساقی، التفاتین بینوالردن،
الیندن گلدیگی خیری دریغ ائتمه گدالردن.
اسیر غربت اوز، بیر سندن اؤزگه آشنامیز یوخ،
آیاغین کسمه، باشینچون، بیزیم محنت سرالردن.
صبا، کویینده دلدارین ندیر افتاده‌لر حالی؟
بیزیم یئردن گلیرسن، بیر خبر وئر آشنالردن.
دئمه، زاهد کی، ترک ائت سیمبر بت لر تماشاسین،
منی کیم قورتاریر تانری ساتاشدیرمیش بلالردن.
گیریب مسجدلره، گر مقتدالر پیروی اولمان،
بودور وجهی کی، هرگز گؤرمدیم اوز مقتدالردن.
طبیبا، خاک کوی یاردن دیر اشک تسکینی،
بیزه آرتیرما زحمت، گؤز یاشارار توتیالردن.
فلک دیر مهری زایل، یار غافل، عمر مستعجل،
ندیر تدبیر، بیلمن، جانه یئتدیم بیوفالردن.
وجودیم نئی کیمی سوراخ سوراخ اولسا، آه ائتمن،
محبتدن دم اوردوق، اینجیمک اولماز جفالردن.
فضولی، نازنین لر گؤرسن، اظهار نیاز ایله،
ترحم اومسا، عیب اولماز، گدالر پادشالردن.