گرچی خاک راهینم، آلماز منی کیمسه گؤزه

یاغما جانیم، نالۀ بی اختیاریمدان ساقین!
تؤکمه قانیم، آب چشم اشکباریمدان ساقین!
سو وئرور هر صبحدم گؤز یاشی تیغ آهیمه،
چوخ منی اینجیتمه، تیغ آبیداریمدان ساقین!
جور اودو یاخدی منی، یانیمدا دورما، ای کؤنول!
بیر توتوشمیش آتشم، قرب جیواریمدان ساقین!
تن ائویندن رختینی، جهد ایله، ای جان، دیشرا چک،
آفت سیل سرشک بی قراریمدان ساقین!
گرچی خاک راهینم، آلماز منی کیمسه گؤزه،
چوخ حقارتله نظر قیلما، غباریمدان ساقین!
شاه ملک محنتم، خیل و سپاهیم درد و غم،
خیل بی حد و سپاه بی شماریمدان ساقین!
گلمه قبریم اوزره، ای عشق ایچره من تک اولمایان!
طعنه داشیدیر سنه، سنگ مزاریمدان ساقین!
ای فضولی، قانسی محبوبی کی، سئوسن رحمی وار،
قیل حذر، آنجاق منیم بی رحم یاریمدان ساقین!