اختلاط ائتسم، اونی شرمنده ائیلر سیرتیم

زایر میخانه یم، من سجده سیدیر طاعتیم،
عشق پیریم، نقد جان نذریم، توکل نیتیم.
هر ساری باخسام، صراحی تک سجود ائتمک ایشیم،
قاندا اولسام، باده تک دوشمک ایاغه عادتیم.
دور زاهد اگر صورتده ائیلر اعتراض،
اختلاط ائتسم، اونی شرمنده ائیلر سیرتیم.
بس کی، جام مئی کیمی خوش مشرب و صافی دلم،
حرمتیم واجب بیلیر هر کیم بیلیر کیفیتیم.
معتبرلیک دیر غرور اهلی، من اوندان فارغم،
اعتباره چون دئگیل قابل محقر طینتیم.
عشق ارباب ریادن زایل ائتمیش مهریمی،
فقر اسباب علایقدن گؤتورموش رغبتیم.
ای فضولی، فقر توپراغیندا دولت ایسته کیم،
سایه اول توپراغه سالمیش دیر همای همتیم