سنم لر سنگ دل لردیر ائشیتمزلر سؤزو، زاهد

حذر قیل آه اودوندان، جورونو عشاقه آز ایله،
خس و خاشاکی یاغما، شعله سیندن احتزاز ایله!
سنم لر سجده سیدیر بیزده طاعت، تانریچون، زاهد،
کیمی گؤرسن سن اؤز دینینده، تکلیف نماز ایله!
حقیقت لوحینی یازماق دیلرسن لوح ذاتیندا،
خطین گلرخ لرین منظور توت، عشق مجاز ایله!
سنم لر سنگ دل لردیر ائشیتمزلر سؤزو، زاهد،
یئتر بیهوده من تک اونلارا عرض نیاز ایله!
سنین نازین گؤرنده عقل قالماز حسبته الله،
آمان وئر طالب دیداره، بیر دم، ترک ناز ایله!
یولوندا انتظار مقدمینله خاک اولان چوخدور،
خرام ائت بیر قدم، مین خاکساری سرفراز ایله!
فضولی، جانه تاپشیردین خیالین، شیمدی رسواسن،
سنه کیم دئر کی، هر نامحرمه افشای راز ایله!