کی، رفیق اولمایا سن ماه ملک سیمایه

عارضین گؤرسه فلک، مهر بوراخماز آیه،
ذره ذره قیلیب اونی بوراخار صحرایه.
لب لرین عکسین آلیب، باغه گیر هر دم سو،
رشک دن قان ایچیریر برگ گل رعنایه.
یئریدیر عکسینه آینه دمیر بند اولسا،
نه ایچون قارشی دورور سن کیمی بی همتایه.
بولدوغو یئرده حسددن گون اورار ساینه تیغ
کی، رفیق اولمایا سن ماه ملک سیمایه.
اوخا پیکان دیکیلیر غمزن ایچون پیوسته،
توخونور طعنه اوخو قاشین اوجوندان یایه.
لعل نابین صفتی شهد مصفا دیر، لیک
آجی ائتمیش اونی سفرای حسد صهبایه.
یار میلین سنه سالمازسا، فضولی، نه عجب،
نئجه میل ائتمک اولور سن کیمی بیر رسوایه.