زلف پریشانینی گؤرجک

کؤنلوم آچیلیر زلف پریشانینی گؤرجک،
نطقیم توتولور غنچۀ خندانینی گؤرجک.
باخدیقجا سنه قان ساچیلیر دیده لریمدن،
باغریم دلینیر ناوک مژگانینی گؤرجک.
رعنالیق ایله قامت شمشادی ایدن یاد،
اولمازمی خجل سرو خرامانینی گؤرجک؟
چوخ عشقه هوس ائدنی گؤردوم کی، هواسین
ترک ائتدی، سنین عاشق نالانینی گؤرجک.
کافر کی، دئگیل معترف نار جهنم،
ایمانه گلر آتش هجرانینی گؤرجک.
نازیک لیک ایله غنچۀ خندانی ائدن یاد،
ائتمزمی حیا لعل دور افشانینی گؤرجک؟
سن حال دلین سؤیلمه سن، نولا، فضولی،
ائل فهم قیلیر ناله و افعانینی گؤرجک.