اشک چشمیم دیر

گوشۀ ابرولرینده چشم جادولارمیدیر؟
یوخسا گیرمیش یایه تیرنداز هندولارمیدیر؟
عقد شبنم دیر گل تر اوزره، یاخود هر طرف،
قطره قطره تردن اول رخسار اوزه سولارمیدیر؟
ایکی اژدردیر کی، بیر گنج اوزره باش قویموش یاتیر،
یا مسلسل عارضین دورینده گیسولارمیدیر؟
اشک چشمیم دیر سر زلفون خیالیله مدام،
یا دوزولموش رشتۀ مشک اوزره لؤلؤلرمیدیر؟
سن می سن آنجاق، فضولی، بؤیله خوب لر مایلی،
یوخسا عشق اهلی قامو سن تک بلاجولارمیدیر؟