اول سنگ دله

ای گل، نه عجب سلسلۀ مشک ترین وار،
ای سرو، نه خوش جان آلیجی عیشوه‌لرین وار!
آجیتدی منی، آجی سؤزون، تند نگاهین،
ای نخل ملاحت، نه بلالی ثمرین وار!
پیکانلار ایله دولودور چشم پر آبیم،
ای بحر، صانوریان، سنین الحق گهرین وار!
اول سنگ دله نالۀ زارین اثر ائتمیش،
ای دل، سنه بو ذوق یئتر، تا اثرین وار.
عشق ایچره، کؤنول، دئمه کی، من بیخودم، آنجاق،
ای غافل، اؤزوندن سنین آنجاق خبرین وار؟
دئدیم یئتر، ائت جور، چو خاک رهین اولدیم،
دئدی کی، یئتر جور سنه تا اثرین وار.
چوخ باخدیغینا غمزه ایله باغرین ازرسن،
هر کیمه کی، باخمازسان اونونلا نظرین وار.
عشق اهلینه اول ماه، فضولی، نظر ائتمیش،
سن هم، اؤزونی گؤستر اگر بیر هنرین وار.