خم ائتدی قامتیم

بودور فرقی، کؤنول، محشر گونونون روز هجراندان
کیم، اول جان دؤندر جسمه، بو جسمی آییریر جاندان.
توتوب راه عدم، بولموش دهانیندان کؤنول کامین،
منه هم جزم دیر اول عزم، من هم قالمازام آندان.
غمیم شرح ائتمک ایچون ایسترم هر گؤردوگوم ساعت،
توتام دامانینی، دگمز الیم چاک گریباندان.
طواف کویین ایستردیم قیلام، بار غم عشقین،
خم ائتدی قامتیم، یوللار توتولدو خار مژگاندان.
نه خوش الفت توتوبدور ناتوان جسمیمله جان، گویا
سانیر بیر تاب مودور اول سر زلف پریشاندان.
اوخون گلدیکده چشمیم تؤکسه باغریم قانین، اوندان دیر
کی، باغریم قانینا یئر قالمادی سینمده پیکاندان.
ستم داشی، ملامت خنجری، بیداد شمشیری،
فضولی، هر جفا کیم، گلسه خوش دور جانه جاناندان.