چیخارماق ایستر

سپهرین فارغم وصلینده ماه و افتابیندن،
غرض عید وصالین دیر بو آی و گون حسابیندن.
تماشای رخون عزمینه چیخدی آفتاب، امّا
گلیرکن سرعتیله دوشدی یوز یئرده شتابیندن.
فلک محجوبدور، شمع رخوندن یاندیریب چرخی،
چیخارماق ایستر اونی شعلۀ آهیم حجابیندن.
فلک عشقینده اول غایتده، ای مه، مضطرب اولموش
کی، هر نه ائیله سه بیلمز نه ائیلر اضطرابیندن.
گونش لوحی دئگیل گؤگده شعاع اوستونده زرین خط،
فلک آلمیش الینه بیر ورق حسنون کتابیندن.
دگیرمان دانه دانه ایچون جیزگینور، بیهوده دور ائتمز،
مجردسن، کؤنول، وهم ائتمه چرخین انقلابیندن!
کیمی هوشیار گؤرسن، اونا وئر جام مئی، ساقی،
بحمدالله، فضولی مست دیر وحدت شرابیندن.