وعدۀ وصلینه اول گوندن کی، وئردیم کؤنلومی

نولا زاهد بیلسه کفر زلفون ایمان اولدیغون،
شیمدی گؤرموشلرمیدیر کافر مسلمان اولدیغون.
من اگر عاشق اولوب، دین وئرمسیدیم غارته،
کیم بیلیردی عشق ملکون کافرستان اولدیغون.
قیل ثواب، ای گؤز، تؤکوب قان، واقف ائت عاقل لری،
میل ائدن لر عشقه بیلسین لر باغر قان اولدیغون.
داشه بنزر قانلی هر پرکاله کیم، گؤزدن چیخار،
اوندان ائتدیم فهم، کؤنلوم شهری ویران اولدیغون.
وعدۀ وصلینه اول گوندن کی، وئردیم کؤنلومی،
من اونون بیلمزمیدیم آخر پشیمان اولدیغون.
عشقینی آسان گؤروب اولدیم اسیری طفل ایکن،
بیلمدیم گلدیکجه بیر آشوب دوران اولدیغون.
ای فضولی، خوبلار وصلینه ائیلرسن هوس،
گوییا، بیلمزسن اول وصل ایچره هجران اولدیغون.