مژده بیر خورشیددن

قانسی ماهین، بیلمزم، مهریله اولموش زار صبح،
هر گون ائیلر خلقه بیر داغ نهان اظهار صبح.
باتدی انجم، چیخدی گون، یا بیر اسیر عشق دیر،
تؤکدو دور اشک، چکدی آه آتشبار صبح.
نولا گر امواته احیا وئرسه صبحون دم لری،
ذکر لعلین دیر کیم، ائیلر دمبدم تکرار صبح.
بیر مصوردیر کی، زرین کلک ایله هر گون چکر،
صفحۀ گردونه نقش عارض دلدار صبح.
مژده بیر خورشیددن وئرمیش مگر باد سحر
کیم، نثار ائیلر اونا یوز مین دور شهوار صبح.
عاشق صادق دیر، اظهار غم ائیلر هر سحر،
آه ایله خلقی یوخوسوندان قیلیر بیدار صبح.
ای فضولی، شام غم انجامینا یوخدور امید،
بیر تسلیددیر سنه اول سؤز کی، دئرلر وار صبح.