اهل تمکینم

منده مجنوندان فزون عاشق لیک استعدادی وار،
عاشق صادق منم، مجنونون آنجاق آدی وار.
نولا قان تؤکمکده ماهر اولسا چشمیم مردمی،
لطفه قابلدورور، غمزن کیمی استادی وار.
قیل تفاخر کیم، سنین هم وار من تک عاشقین،
لیلی نین مجنونو، شیرین نین اگر فرهادی وار.
اهل تمکینم، منی بنزتمه، ای گل، بلبله،
درده یوخ صبری اونون، هر لحظه مین فریادی وار.
اؤیله بد حالم کیم، احوالیم گؤرنده شاد اولور،
هر کیمین کیم، دور جوروندن دل ناشادی وار.
گزمه، ای کؤنلوم قوشو، غافل فضای عشقده
کیم، بو صحرانین گذرگاهینده چوخ صیادی وار.
ای فضولی، عشق منعین قیلما ناصح دن قبول،
عقل تدبیری دیر اول، سانما کی، بیر بنیادی وار