من فقیرم، سن غنی

مرده جسمیم التفاتیندان بولور هر دم حیات،
اولورم، گر قیلماسان هر دم منه بیر التفات.
یازه بیلمز لب لرین وصفین تمام عمرده،
آب حیوان وئرسه خضره کلک خضره ظلمتدن دوات.
من فقیرم، سن غنی، وئرگیل زکات حسن کیم،
شرع ایچینده هم منه دیر هم سنه واجب زکات.
گؤرمیینجه عشقینی ایمانه گلمز عاشقین،
یوز پئیمبر جمع اولوب، گؤسترسه‌لر مین معجزات.
مظهر آثار قدرت دیر وجود کاملین،
فیض فطرتدن غرض سن سن، طفیلین کاینات.
جوهر ذاتینده دیر مجموع اوصاف کمال،
بو صفات ایله کی، سن سن، قاندا دیر بیر پاک ذات؟
عشقه تا دوشدیم، فضولی، چکمدیمدنیا غمین؛
بیل کی، قید عشق ایمیش دام تعلقدن نجات.