تا فضولی قامت و رخسارینا وئرمیش کؤنول

هیچ سنبل سنبل زلفون کیمی مشکین دئگیل،
نافۀ چینی ساچین تک دئرلر، امّا چین دئگیل.
وار گل برگینده هم الحق، نزاکت بیرله رنگ،
لیک، جان پرور لب لعلین کیمی شیرین دئگیل.
مهربان دئرلر سنی اغیاره، لیکن من اونا
باور ائتمن کیم، سنه مهر ائیله مک آیین دئگیل.
خوب لر محراب ابروسینه قیلمازسان سجود،
دینینی دؤندرگیل، ای زاهد، کی، یاخشی دین دئگیل.
تا فضولی قامت و رخسارینا وئرمیش کؤنول،
مایل سرو هوا خواه گل و نسرین دئگیل.