ائتمک اولماز سنی آگاه کؤنول حالیندان

ای رخون قبلۀ جان، خاک درین کعبۀ دل،
ره عشقینده فنا سرحدی اول منزل.
لاله رنگ ائتدی گؤزوم قان ایله خاک درینی،
کیمیاگردیر ائدر گؤردوگو توپراغی قزل.
اول کی، یارین شب هجرینه قیامت گونو دئر،
خلق آراسیندا قیامت گونو اولمازمی خجل؟
قاتی مشکل دور ایشیم زلف گره گیریندن،
صبر بو مشکلی، دئرلر، آچار، امّا مشکل.
ائتمک اولماز سنی آگاه کؤنول حالیندان،
یازیق اول کیم، سنه کؤنلون وئره، سندن غافل.
سئویرم زاهدی کیم، گوشۀ محرابی سئور،
خم ابرویه رقیبیم اولوب، اولماز مایل.
دلی دئرسم نولا عشاقینا گلچهره لرین،
اؤزونی گؤز گؤره اودلاره سالیرمی عاقل؟
سنی جانان سانیرام، چیخ بدنیمدن، ای جان!
من و جانانیم آراسیندا چوخ اولما حایل.
ای فضولی، یانیرام کیم، نه ایچون اول اوزو گل
منه یانار اود اولور، اؤزگه یه شمع محفل.