دود آهیمدن

اولور قددیم دوتا عشقین یولوندا، هر بلا گؤرجک،
طریق اهلینه عادت دیر تواضع، آشنا گؤرجک.
نهان عشقیمی معلوم ائتسه عالم، دود آهیمدن،
عجب یوخ کیم، گمان گنج ائدر خلق، اژدها گؤرجک.
فزون اولدیقجا عشقین گرم اولور اشکیم گؤزوم ایچره،
اگرچی سو بورودت کسبینی ائیلر هوا گؤرجک.
غمین هر لحظه کیم، جانیم دلر، کؤنلوم قیلار افغان،
بعینه ائیله کیم، فریاد ائدر ایتلر، گدا گؤرجک.
رواج نقد نقش سکه دن دیر، نولا قدر ائتسه
منه ائل، جسم عریانیمدا نقش بوریا گؤرجک.
من درویشه ائل هم جور ائدر، سن جور قیلدیقجا،
کیم ائیلر ظلم منعین، پادشاهیم، سن روا گؤرجک؟
فضولینی یاشور، ای ضعف، مهوش لر جفاسیندان
کی، مهوش لر قیلیرلار مین جفا، بیر مبتلا گؤرجک.