یاندیریب پروانه

گر دئگیل بیر ماه مهرایله منیم تک زار صبح،
باشین آچیب نیشه هر گون یاخاسین ییرتار صبح؟
گون دئگیل، هر گون بیر آی مهریله کؤکسون چاک ائدیب،
تازه تازه داغی لردیر کیم، قیلیر اظهار صبح.
تیغ خورشید ایله رفع اولسا یئریدیر کیم، مدام
یاندیریب پروانه، شمعه وئریر آزار صبح.
صبح و شام و شام و صبح اولموش منم عالمده کیم،
شام بزم شمع اولوب، آیریلدی مندن یار صبح.
گؤر نه عاشق دیر کی، بیر خورشید وصلین بولماغا
صرف ائدر هر لحظه مین مین لؤلؤ شهوار صبح.
عشقده صادق لیک اظهار ائتدی داغین گؤستریب،
غالباً دئرلردی کاذب، قیلدی اوندان عار صبح.
هجر شامیندا غم ائتمیشدی فضولی، قصدینه،
اولماسایدی مرحمتدن دم اوروب غمخوار صبح.