منه دشواردیر اول

سرو آزاد قدینیله مانا یکسان گؤرونور،
نیه سرگشته اولان باخسا، خرامان گؤرونور.
جان گؤرونمز دئسه‌لر تنده اینانمان، نیشه کیم،
لطف دن هر نئجه باخسام تنینه، جان گؤرونور.
دئرم احوالیمی جانانه قیلام عرض، ولی،
گؤره بیلمم اؤزومو اوندا کی، جانان گؤرونور.
ای دئین: صبر قیل، آه ائیله‌مه یاری گؤرجک،
منه دشواردیر اول، گر سنه آسان گؤرونور.
صوردوم احوالیمی عشقینده منجم لردن،
باخدی لار طالع ائوینه، دئدی لر: قان گؤرونور.
نه کماندارسان، ای مه، کی، آتیب غمزه اوخون،
ییخدیغین صیدده نه زخم، نه پیکان گؤرونور.
بیر صنم زلفونه گویا کی، وئریب دیر کؤنلون
کی، فضولی نین ایکن حالی پریشان گؤرونور.