گؤزون مخمور

سیر قیل، گؤر کیم، گلستانین نه آب و تابی وار،
هر طرف بیر سرو سرسبز و گل سیرابی وار.
پنجه برگ چنار ائتمیش مهیا شانه لر،
آنلامیش گویا کی، سنبل کاکیلی نین تابی وار.
راحت ایچون فرش سالمیش سبزۀ تر گلشنه،
نرگسین گؤرموش گؤزون مخمور، صانمیش خوابی وار.
بولونور هر درده ایسترسن، گلستاندا دوا،
غنچه سینده حقه تک صانکیم شفا جلابی وار.
گلدو گل، آچیلدی نرگس، لاله دولدو ژاله دن،
ای خوش اول کیم، عشرت و عیش ائتمه یه اسبابی وار.
قالیب اولموش خلقه ذوق سیر گلشن، گویا
چکمه یه خلقی بنفشه زلفونون قلابی وار.
گر فضولی میل گلزار ائتسه فصل گل، نولا
عیش ایچون خونابۀ دلدن شراب نابی وار.