پروانه یم، ای شمع، توتوشموش پر و بالیم

اول ماه وصالیله خوش ائت بیر گئجه حالیم،
ای اختر طالع قوما بوینوندا وبالیم!
فریاد کی، بیر وئرمه‌دی بیداددن اؤزگه،
گؤز یاشی ایله بسلدیگیم تازه نهالیم.
اول شمع خیالیله خوشام، اولمایا دایم،
بو صورت ایله جیزگینه فانوس خیالیم.
یانمیش مژه تک، خلق گؤزوندن آخیدیر یاش،
نظارۀ ضعف بدن موی مثالیم.
سوزان دیر اودومدان تنیمه سانجیلان اوخلار،
پروانه یم، ای شمع، توتوشموش پر و بالیم.
ساقی، غم دوران ایله غایتده ملولم،
بیر جام فرح بخش ایله دفع ایله ملالیم.
لطف ایله، فضولی، منیم احوالیمی عرض ائت
اول سروه کی، سؤیلشمه یه قویمادی مجالیم.