سیلاب سرشک ایله خوشام عشق یولوندا

گرد رهین، ای اشک، یودون چشم تریمدن،
ترک ادب ائتدین، نولا دوشسن نظریمدن.
خونین مژلردیرمی و یا مردم الیله،
اوخلار چکیلیب، دیشره آتیلمیش جگریمدن؟
هر باده کی، سنسیز ایچیرم بزم بلاده،
خوناب اولوب، البته، چیخار دیده لریمدن.
سیلاب سرشک ایله خوشام عشق یولوندا،
خاشاکه تعلق قوپاریر رهگذریمدن.
داشلاره دویوب باشیمی، رسوا گزر اولدیم،
ای عقل، قاچیب قورتولا گؤر درد سریمدن.
کس مهرینی، ای چرخ، گونش دن، سنه هر صبح
بیر شعله یئتر آتش آه سحریمدن.
سیلاب سرشک ائتدی منی غرقه، فضولی،
تا دور جدا قیلدی بت سیمبریمدن.