تلخ شربت لردن اکراه ایله ین بیمار تک

ای کؤنول، چوخ سیر قیلما، گنبد دوار تک،
ساکن اولماق سیردن یک، نقطۀ پرگار تک.
اون وئریر جان رشته سی، خم قامتیمدن چکسم آه،
یئل دگیب چنگ اوزره، آوازه گلمیش تار تک.
سینه می نای اوخلارین دلدی دم اوردوقجا کؤنول،
اون وئریر هر بیر یانینده ناله موسیقار تک.
عارضین اوزره خم زلفون انیب، دون تا سحر،
دولانیردیم هر طرف اودلاره دوشموش مار تک.
جسم زاریم تیغ بیدادیندن اولدی چاک چاک،
تنده سودن رخنه‌لر پیدا قیلان دیوار تک.
بیلمه‌ییب بهبودیمی جوروندن ائتدیم اجتناب،
تلخ شربت لردن اکراه ایله ین بیمار تک.
خاطرین جمع ائیله دین، اهل وفا کؤنلون پوزوب،
بیر عمارت یاپماغا مین ائو ییخان معمار تک.
بی بقا دیر نشاء مئی، ذوقین ائتدیم امتحان،
هیچ ذوق باقی اولماز نشاء دیدار تک.
ای فضولی، خاطر اهل صفا آینه دیر،
چرخ جوروندن اثر، آینه ده زنگار تک.