قیلسام سجده هر ساعت

هر زامان منظور بیر شوخ ستمگردیر مانا،
قاندا اولسام بیر بلا حقدن مقدردیر مانا.
اول خم ابرویه قیلسام سجده هر ساعت، نولا،
قبله ایله اول خم ابرو برابردیر مانا.
غم دئگیل، جسمیمده گر سنگ ملامت زخمی وار،
سحنۀ بازار سئودایم، بو زیوردیر مانا.
گؤزده خون آلوده پیکانین خیالیله خوشام،
هر بیری، گویا کی، بیر برگ گل تردیر مانا.
زخم لردن مین آغیز اوچدوم ادای شکره کیم،
هر داغون بیر نعمت غیر مکرردیر مانا.
عقل ارشادیله اولماق کام حکمت دور، ولی
دام راه اول حلقۀ زلف مونبردیر مانا.
اختر بختیم وبالین گؤر کی، اول مه دن گلن
مهرلردیر اؤزگه یه، جور وجفالردیر مانا.
ای فضولی، منزل مقصوده یئتسم، نه عجب،
خدمت پیر مغان ارشادی رهبردیر مانا.