مست خواب ناز اولوب

آشیان مرغ دل زلف پریشانیندا دیر،
قاندا اولسام، ای پری، کؤنلوم سنین یانیندا دیر.
عشق دردیله خوشام، ال چک علاجیمدان، طبیب،
قیلما درمان کیم، هلاکیم زهر درمانیندا دیر.
چکمه دامان، ناز ائدیب، افتاده لردن، وهم قیل،
گؤگ لره آچیلماسین اللر کی، دامانیندا دیر.
گؤزلریم یاشین گؤروب شور، ائتمه نفرت کیم، بو هم
اول نمک دن دیر کی، لعل شکّر افشانیندا دیر.
مست خواب ناز اولوب، جمع ائت دل صد پاره نی
کیم، اونون هر پاره سی بیر نوک مژگانیندا دیر.
بس کی، هجرانیندا دیر خاصیت قطع حیات،
اول حیات اهلینه حیرانم کی، هجرانیندا دیر.
ای فضولی، شمع تک مطلق آچیلماز یانمادان،
تابلار کیم، سنبلوندن رشتۀ جانیندا دیر