بیر دوا سیز درده

کوهکن شیرینه اؤز نقشین چکیب وئرمیش فریب،
گؤر نه جاهل دیر، یونار داشدان اؤزیچون بیر رقیب.
قاشلارین یانی بیر اوخ لطف ایلمیش هر عاشقه،
من هم اوندان ائیلرم بیر اوخ تمنا، یا نصیب.
توتیای خاک پایین فیضینه یول بولمیشم،
نور چشمیم، عیب قیلما، کور اولور دئرلر غریب.
مضطرب دیر چارۀ دردیمده، وه کیم، بیلمه‌ییب،
بیر دوا سیز درده اوغراتمیش اؤزون مسکین طبیب.
برق آهیمدن ائویم هر گوشه بولموش رخنه لر،
گل گؤر، ای گل، کیم، گرفتار قفس دیر عندلیب.
ای منه صبر ائت دئین، حال دلیمدن بی خبر،
عشق اولان یئرده ندیر آرام، یا نئیلر شکیب؟
ای فضولی، اینجیمه سندن تغافل قیلسا یار،
رسم دیر کیم، گؤستره احبابه استغنا طبیب.