نسبتیم فرهاده کیم، بیر داغ ایله اولموش زبون

تا سرشک دیدۀ فرهادی گؤردو لاله گون،
چشمه‌لر سویینی گؤزدن سالدی کوه بیستون.
تا الم قالدیردی آه آتشینیم، شرم ائدیب،
قیلدی خورشیدین فلک زرین لواسین سرنگون.
داش باغرلی اولماسایدی بیستون، فرهاد ایچون،
سو یئرینه گؤزلریندن آخیداردی سیل خون.
ای گؤرن مین داغ ایله صبر و ثباتیم، ائیله‌مه
نسبتیم فرهاده کیم، بیر داغ ایله اولموش زبون.
قوش یواسی سانما کیم، سرگشته مجنون باشینه
خار و خس جمع ایلمیش گرداب دریای جنون.
تا گؤروندو صفحۀ حسنونده خطین، رشک دن،
داشه چالدی آفتاب ساده لوحین چرخ دون.
ای فضولی، خاک کوی یاره یئتدیم، خانی خضر
کیم، وئروب کامین، اولام آب حیاته رهنمون.