مژه ن قانیم تؤکوب، غمزن آلیر جانیم، عجب سانما

چکر بی رحم لر یانیندا هر ساعت زبان خنجر،
گناهیم ثابت ائیلر، اؤلمییم خاطرنشان خنجر.
زلال وصلینه لب تشنه یم بیر تورک بدخویین
کیم، اوندان قطرۀ آب ایسته سم دارتار روان خنجر.
وئریر پروانه اؤز جانین سنه چون اختیارایله،
نه حاجت شعله دن، ای شمع، چکمک هر زامان خنجر؟
حذر قیل، گزمه چوخ پروا سیز، ای بلبل کی، قتلینچون
تیکاندان دامنی آلتیندا قیلمیش گل نهان خنجر.
مژه ن قانیم تؤکوب، غمزن آلیر جانیم، عجب سانما،
ایشی دیر تؤکسه قان اوخ، عادتیدیر آلسا جان خنجر.
قاشینلا گؤزه‌لرین دیر هر طرف، یا بیر نزاع اوزره
چکیب دیر بیر بیرینه ایکی سرخوش تورکمان خنجر؟
خیال غمزه ن ایله بس کی، راحت گئتدی جسمیمدن،
ساناسان پهلوی چاکیمده دیر هر استخوان خنجر.
ایلتسم خنجرین شوقینی قبره، هر باهار اولغاج،
اولور سبزه یئرینه خاک قبریمدن عیان خنجر.
قوجار زرین کمرله بئلینی، وه بو نه طالع دیر
کی، آلتون قوّت ایله بؤیله اولموش کامران خنجر.
خیالی گؤزده دیر، کیرپیک لرین دپرتمه، ای مردم،
ادب شرطی دئگیل مهمانه چکمک میزبان خنجر.
گؤز آچیب بوستانه خط سبزین سیز نظر قیلسام،
گؤرونور گؤزه لریمه سبزۀ هر بوستان خنجر.
دهانین یوخ دئمیش لر، سؤیله بو گفتار قاندان دیر،
بئلین پیدا دئگیل، دئ قاندا دوتموش دور مکان خنجر؟
محال عقل دیر کیم، اولا مژگانین کیمی خونی،
اگر استاد الیندن سو یئرینه ایچسه قان خنجر.
رخ زردیم سالیب دیر خنجرین گوزگوسینه عکسین،
و یا سیمین الینده توتدوغون دور زرنشان خنجر.
زبان تیز ایله اورتایه گیرمیش متصل گویا،
اولام دئر مادح پیغمبر آخرزمان خنجر.
شهنشاهی کی، تیغ آبداری ظاهر اولدیقدا،
الیندن سالدی خسرو نیزه و نوشیروان خنجر.
یمندن باش چکنده مهچۀ رایات اقبالی،
بوراخدی تیره تورپاغه شه هندوستان خنجر.
صف آرای مصاف بدردیر اظهار معجزده،
شکاف پرنیان بدر ایچون قیلمیش نشان خنجر.
عدوی جاهی نین قطع حیاتیچون چکر هر آی،
غلاف لاجوردیدن هلال آسمان خنجر.
سحر فیضی کی، دونت ک تیره قیلمازدی دل صافین،
گونش تک قصدینه چکسیدی مین نامهربان خنجر.
سخن طبعی کی، رخساره سپرتک چین بوراخمازدی،
اگر قصدینه چکسیدی قامی اهل زمان خنجر.
اولوردو دیدۀ بدبینه اظهار نبوتده،
اونون گؤندردیگی هر نامۀ معجزبیان خنجر.
غزالارده دعای جوشنینده چاره قیلمازدی،
اؤزون هر نئجه قیلسا تجربه تیر، امتحان خنجر.
ایا شاهی کی، باخسان خنجر شرعین نظامی چون،
چکیب دیر مین شاهنشه تیغ و مین صاحبقران خنجر.
اگر قاموس شرعین اولماسایدی خلقه مستو لی،
نه بیر پردل چکردی تیغ و نه بیر پهلوان خنجر.
نقیض حکمونون قطع فسادیچون الف لردن،
کلام الله بی حد تیغ چکمیش، بیکران خنجر.
منافق ائده بیلمز شرعینه مدخل کی، چئوره نده
ملایک پر و بالین گؤرسه، دیو ائیلر گمان خنجر.
بحمدالله کی، حالا دیدۀ بدخواهه تیغیندن
فضولی نظمی نین هر سطری دیر بیر جان ستان خنجر.
زبان خامه سی اثبات اعجازیندا کفاره،
گهی دلدوز ناوک گؤسته ریر، گه خونفشان خنجر.
شفیق المذنبینا، محشر ایامی کی، دوزخ دن،
چکر هر لحظه مجریم قصدینه بیر بی امان خنجر.
بودور امید کیم، محفوظ اولام حصن پناهینده،
غلاف ایچره نئتک کیم، ساخلانیر، گؤرمز زیان خنجر.