سویا وئرسین باغبان گلزاری، زحمت چکمه سین

ساچما، ای گؤز، اشکدن کؤنلومده کی اودلاره سو
کیم، بو دنلی توتوشان اودلارا قیلماز چاره سو.
آبگوندور گنبد دوار رنگی، بیلمزم،
یا محیط اولموش گؤزومدن گنبد دواره سو.
ذوق تیغیندن عجب یوخ، اولسا کؤنلوم چاک چاک
کیم، مرورایلن بوراخیر رخنه‌لر دیواره سو.
وهم ایلن سؤیلر دل مجروح پیکانین سوزون،
احتیاط ایلن ایچر هر کیمده اولسا یاره، سو.
سویا وئرسین باغبان گلزاری، زحمت چکمه سین،
بیر گل آچیلماز اوزون تک، وئرسه مین گلزاره سو.
اوخشادا بیلمز غبارینی محرر خطینه،
خامه تک باخماقدان ائنسه گؤزه لرینه قاره سو.
عارضین یادیله نمناک اولسا مژگانیم، نولا؟
ضایع اولماز گل تمناسیله وئرمک خاره سو.
غم گونو ائتمه دل بیماردن تیغین دریغ،
خیردیر وئرمک قارانقو گئجه ده بیماره سو.
من لبین مشتاقی یم، زهاد کوثر طالبی،
نئجه کیم مسته می ایچمک خوش گلیر، هوشیاره سو.
ایسته پیکانین، کؤنول، هجرینده شوقوم ساکن ائت،
سوسوزام، بیر گز بو صحراده منیم چون آره سو.
روضۀ کویینه هر دم دورماییب ائیلر گذار،
عاشق اولموش غالباً، اول سرو خوشرفتاره سو.
سو یولون اول کوی دن توپراق اولوب دوتسام گره ک،
چون رقیبیم دیر، داخی اول کویه قویمان واره سو.
دستبوسی آرزوسوندان گر اؤلسم، دوست لر،
کوزه ائیلین توپراغیم، سونون اونونلا یاره سو.
سرو سرکش لیک قیلیر قمری نیازندان، مگر،
دامنین توتا، ایاغینه دوشه، یالواره سو.
ایچمک ایستر بلبلون قانین، مگر بیر رنگ ایله،
گل بوداغی نین مزاجینا گیره، قورتاره سو.
طینت پاکینی روشن قیلمیش اهل عالمه،
اقتدا قیلمیش طریق احمد مختاره سو.
سیّد نوع بشر، دریای دُرّ اصطفا
کیم، سپیب دیر معجزاتی آتش اشراره سو.
قیلماق ایچون تازه گلزار نبوت رونقین،
معجزوندن ائیله‌میش اظهار سنگ خاره سو.
معجزی بیر بحر بی پایان ایمیش عالمده کیم،
یئتمیش اوندان مین مین آتشخانۀ کفاره سو.
حیرت ایلن بارماغین دیشلر، کیم ائتسه استماع،
بارماغیندان وئردیگین شدت گونو انصاره سو.
دوستی گر زهرمار ایچسه اولار آب حیات،
خصمی سو ایچسه دؤنر، البته، زهر ماره سو.
ائیله‌میش هر قطره دن مین بحر رحمت موج خیز،
ال سونوب اورقاج وضو ایچون گل رخساره سو.
خاک پاینه یئتم دئر، عمرلردیر متصل،
باشینی داشدان داشا اوروب گزر آواره سو.
ذره ذره خاک درگاهینه ایستر سالا نور،
دؤنمز اول درگاه دن، گر اولسا پاره پاره سو.
ذکر نعتین دردینه درمان بیلیر اهل خطا،
ایله کیم، دفع خمار ایچون ایچر میخواره سو.
یا حبیب الله! یا خیرالبشر! مشتاقینم،
ایله کیم، لب تشنه‌لر یانیب دیلر همواره سو.
سنسن اول بحر کرامت کیم، شب معراجده،
شبنم فیضین یئتیرمیش ثابت و سیاره سو.
چشمۀ خورشیددن هر دم زلال فیض ائنر،
حاجت اولسا، مرقدین تجرید ائدر معماره سو.
بیم دوزخ نار غم سالمیش دلسوزانیمه،
وار امیدیم ابر احسانین سپه اول ناره سو.
یُمن نعتیندان گوهر اولموش فضولی سؤزلری،
ابر نیساندان دؤنن تک لؤلؤی شهواره سو.
خواب غفلتده اولان بیدار اولاندا روز حشر،
اشک حسرتدن دولاندا دیدۀ بیداره سو،
اومدوغوم اولدیر کی، روز حشر محروم اولمایام،
چشمۀ وصلین وئره بو تشنۀ دیداره سو.