مشرف ائیله‌دی ذات شریفین خاک بغدادی

بحمدالله والمنّه کی، توفیقات ربانی
یئتیردی منزل مقصوده ابراهیم سلطانی.
طریق کربلا، راه نجف بیر رهبر ایستردی،
بو یولدا گؤردو حق خضر اولماغا سلطانی ارزانی.
ولایت دُرلری نین معدنی دیر اولیا برجی،
امین حق گؤروب سلطانا تاپشیردی فلک آنی.
ایا سلطان عالی همت و سردار عادل دل
کی، سنسن گوهر انصاف و دُرّ معدلت کانی.
مشرف ائیله‌دی ذات شریفین خاک بغدادی،
عمارت قیلدی رأی گنج بخشین ملک ویرانی.
صفا تاپدی وصال مقدمیندن تنله جان باغی،
اساس آلدی بینای همَتیندن عدل ایوانی.
قدم باسدین دیار اشرف بغداده سن بیر بیر
مزارات و بقاع الخیر سندن اولدی نورانی.
زیارت لر کی، قیلدین، آستانلار کیم، طواف ائتدین،
قبول اولسون کی، تاپدین هر بیریندن فیض ربانی.
مقام قنبر و اولاد فضل و بعض اهل بیت
طواف ائتدین، جوانمردانه قیلدین عرض احسانی.
علی نین پنجه سین قیلدین زیارت کیم، مقرر دیر،
یئنی گؤردوکده مخدومین ال اؤپمک بنده فرمانی.
ضیای رفعتیندن سایه بولدو، سیر وقتینده
گهی بهلول دیوانه، گهی منصور حقانی.
همیشه خصمینی شاه ولایت داشه دؤندرسین
نئجه کیم، گؤردون ائتمیش معجز ایلن داش آسلانی.
مقام منطقه طوفین قیلیب اولدین کمربسته،
اؤپوب عون و معین درگاهین ائتدین تازه ایمانی.
جواد و کاظمین عطار بغداد اولدیغون بیلدین،
اوز اوردون، تاپدین اول عطاردن هر درده درمانی.
تقی و عسکری و مهدی یه انصار گؤندردین
کی، آلایشلی کافر لشکریندن ساخلایا آنی.
فرات پاک تک بابل دیارینا قدم باسدین،
بروج زهره سینده اولدی سندن اول هاروت زندانی.
مثال مشهد شمس و مزار جمجمه بیر بیر
تماشاسیله گؤردون معجزات شاه مردانی.
عاقل ابن ابی طالبدن استمداد ائدوب همت،
طریق کربلایه باشلادین اقران و اعیانی.
چو دشت کربلایه لشکر اسلامی جمع ائتدین،
یقین اولدی کی، شاه کربلانین ایسته نیر قانی.
ادای طاعت و عرض نیاز ائتدین، بحمدالله
کی، مقبول اولدی بیت اللهه ابراهیم قربانی.
یئتیردین نیت پاکیله بیر بیر جد و آبایه
سلام روضۀ پاکیزۀ شاه خراسانی.
بو گون سرمنزل مقصوده یئتدین راه وحدتده،
رفیق اولدی سنه توفیق، تاپدین وصل جانانی.
نه جانان، جان مطلق، بلکه جاندان افضل و اشرف
کی، درگاهینده ائیلر جان نثارین انسی و جانی،
خدانین “اِنَّما” قولینده خلق ایچره ولیعهدی،
رسولین “لَحْمُکّ لَحْمی” سر خوانیندا مهمانی.
گه محتاجه وئرمیش قنبری طغیان ائدیب لطفی
گهی آسلاندان آلمیش مضطرب حالتده سلمانی.
گهی وئرمیش رسولا عرشده آسلان ایله مُهرون
گهی عرض ائتمیش الده خاتم حکم سلیمانی
طفیل گوهر ذات شریفی آدام و عالم،
فدای جوهر جسم لطیفی بحری و کانی.
امیرالمؤمنین حیدر علی بن ابی طالب
کی، جبریل امین دیر خلوت وحدتده دربانی.
نه دیر دنیا و عقبی بی رضای مرتضی بالله،
نه اول باقی گرک صدق اهلینه، مطلق، نه بو فانی.
مدام اول کیم، بو درگاهین قامی سادات و خدّامین
سراسر جمع خاطر قیلدین اول جمع پریشانی.
من غافل دن آگاه اول کی، بیر کمتر ثناخوانم،
گرک سن تک سرافرازین منیم تک بیر ثناخوانی.
فضولی، بو حرم ایچره شب و روز و گه و بیگه،
دعای خیر قیل سلطانه، ترک ائت سیر بستانی.
الهی تا بنای دهر باقی، مخلد قیل
بو سلطان جوانبختی، بو سردار جهانبانی!
نه اوراد و دعا کیم، قیلدی سلطان آستانلاردا،
قبول اولسون، بودور دلشاد ائدن یوز مین مسلمانی.