یئنه دیوانۀ عشق ائیله‌دی دارالشفا میلین

یئنه قیلدی صبا گلزاره دعوت بلبل زاری،
یئنه قمری مقام ائتدی فضای صحن گلزاری.
یئنه دوشدی هوادن سبزه زاره قطرۀ شبنم،
یئنه گلزاره سالدی ظل رحمت ابر آذاری.
یئنه دیوانۀ عشق ائیله‌دی دارالشفا میلین،
یئنه گلزاره چیخدی گوشۀ محنت گرفتاری.
یئریندن تپره دن من مبتلایی شوق غالب دیر،
هاوا دیر گزدیرن یئردن یئره صبر گرانباری.
بو عشرتگاهین اتمامیندا بیر داش اولماسا اسکیک،
منی یئردن یئره نقل ائیله مزدی دهر معماری.
قد خم بیرله تحریکیم یئریمدن محض حکمت دیر،
قضا صورتگری بیهوده گزدیرمز بو پرگاری.
مکان تغییری صحت موجبی دیر، نولا نقل ائتسه
طبیب حکمت حق مُلکدن مُلکه بو بیماری.
منه من اولدوغوم منزلده راحت رحم ائدیب گلمز،
دوشوب زحمتلره ناچار من اولدیم طلبکاری.
هوای سیر قیلدیم ارتفاع قدر ایچون، زیرا
یئرینده هر متاعین پست اولور البته مقداری.
رواج عشق وئرمک قصدینه چیخدیم دیاریمدان،
هنر ضایع دیر اول کشورده کیم، یوخدور خریداری.
محبت قیلماغا اظهار، غربت اختیار ائتدیم،
نه چاره، یوخ بو جنسین اولدوغوم یئرلرده بازاری.
مبارک دیر سواد دود آهیم قاندا عزم ائتسم،
یامان اولماز سحابین گزدیگی یئرلرده آثاری.
مکرّم دیر سرشکیم قاندا یئر دوتسام، بو یوزدن کیم،
باهار انگیز اولور هر قاندا کیم، سیلاب اولور جاری.
یئنه ای بلبل بیچاره، ایام بهار اولدی،
ایریشدی وقت کیم، بخت اولا اهل درد غمخواری.
گوله گول، آچیلا نرگس لطافتی بوستانینده،
قوپا سیلاب ذوق ایله ستم خاشاکی، غم خاری.
سنه اولا میّسر خلوت وحدتده گل وصلی،
نصیب اولا منه پاشای گلرخسار دیداری.
زهی پاشای مُلک آرای دولتمند و روشندل
کی، مقبول جمیع خلق دیر مجموع اطواری.
سلوک دلکشی طی طریق استقامتده
مخالف دؤوردن قیلمیش پشیمان چرخ قداری.
حقیقتده ایلاهین اکبر آیات تقدیری،
شریعتده رسولین اعظم اعوان و انصاری.
زمانیندا زمانه ظلمو یوخ، انصافی وار ائتمیش،
اونا منسوب دور ظلم ایله انصافین یوخو، واری.
فراغت خوابگاهین بکله‌ییب بیم حوادثدن،
اولوبدور پاسبان ملک و ملت بخت بیداری.
بهار گلشن دولت، ایاس پاکدامن کیم،
وجودی هر خلل دن پاک دیر، هر عیبدن عاری.
زهی شمع شبستان سخا و لطف کیم، اولموش
قامی احباب و اعدایه روشن نوری و ناری.
شها، شفقت شعارا، سنسن اول پاکیزه سیرت کیم،
سنه حاجت دئگیل احسان ایچون درد دل اظهاری.
وجود بی مثالین دولت اسلامه نصرت دیر،
مجرد صیت رزمین ائیله‌میش مغلوب کفاری.
فرید عصرسن، امّا گزر هر قلبده مهرین،
گونش بیردیر، ولی مقسوم دور هر یئرده انواری.
فلک دیر اؤیله محکومون کی، خورشیدی قیلیر حاضر،
اگر یاری گئجه بزمینده لازم اولسا احضاری.
روان دیر اؤیله فرمانین کی، گر سیلابه حکم ائتسه،
خلاف طبع اسفل دن اولور اعلایه رفتاری.
اگر قیلسان عنایت ور اهانت اختیار ائتسن،
قیلیر تبدیله قابل لطف و قهرین موری و ماری.
زامانین جملۀ اوقاتینی صبح ائیله‌میش گویا،
چراغیله بولونماز ظلم دؤوری نین شب تاری.
کمال حسن اخلاقین بیان ائیلر آچیلدیقجا،
سمن مجموعه سی، نسرین کتابی، غنچه طوماری.
صفای طبعینه ممکن اولوردو ائیله مک نسبت،
بهار آینه سینده اولماسایدی سبزه زنگاری.
تصور ائیله مک اولماز سنه مانند بیر کامل،
همانا سنده ختم اولموش کمال قدرت باری.
صبا وصف رخون قیلدیقدا، گل وصفینی سؤیلرکن
توتولدو غنچه نطقی، بلبلون حصر اولدی گفتاری.
ثبات عدل ایچون رونق بوراخدین ملک بغداده،
بقای گنج ایچون، ای خضر، یاپدین کهنه دیواری.
بو گون بغداددا بیر کیمسه یوخ کیم اونا رأفت یوخ،
جمیع مردم بغدادا اولموش رفعتین ساری.
دوتولموشدو دلیم محنت گؤروب، حسن تکلمدن،
گتیردی یادیما ذوق صفاتین شوق اشعاری.
منی اندیشۀ حرمان طریق کفره سالمیشدی،
امید لطف و احسانین بئلیمدن آچدی زنّاری.
ممالک پرورا، یوخ سندن اؤزگه بیر مدبر کیم،
دمادم مطرح لطف ائده عشاق دل افگاری.
فضولی بلبل گلزار حسن التفاتین دیر،
بهار اولدی، یئنه گفتاره تحریک ائتدی منقاری.
دیلر تفصیل ایله حال دلین شرح ایله یه، امّا
نه شرح ائتسین، سنه معلوم دور مجموع اطواری.
قالیب دیر گوشۀ عزلتده، سورماز هیچ کیم حالین،
نه اولا بیر فقیرین حالی کیم، اولمایا بیر یاری.
جفاسین هیچ بی دل چکمز اوندان غیری اغیارین،
اونونچون غالباً خلق ائیله‌میش دیر تانری اغیاری.
امیدیم وار کیم، رسم مقرر اوزره اولدیقجا
مزیّن شام زلفیله عروس صبح رخساری،
سنه منسوب اولا خلوت سرای دهر تزیینی،
سنینله چیزگینه عشرتگه اقبال پرگاری.