نه خوش دور اول مسافر کیم، سفر عزمینی جزم ائیلر

نه خوش دور الده گلگون جام، باشدا عشق سئوداسی،
کؤنولده وصل ذوقی، جاندا جانانلار تمناسی،
کؤنول بیر قاچ زامان اندوه هجران ایله زار ائتمک،
یئنه امید ایله آهنگ بزم وصل یار ائتمک.

نه خوش دور اول مسافر کیم، سفر عزمینی جزم ائیلر،
توتوب راه توکل منزل مقصوده عزم ائیلر.
بولوب سودین سفردن، کسب ائدیب سرمایۀ عشرت،
دؤنوب مُلکینه هر منزلده بیر تدبیر بزم ائیلر.
فرحناک اؤیله کیم، بیر نازنین شهباز صید افکن
آلیر صیدین، اولوب خوشوقت و خرم مایل مسکن.

نه خوش دور آشیاندان دم به دم شهباز پروازی،
شکار اوزره هوا توتماقدا اولماق چرخ همرازی.
ووروب منقار، آچیب چنگال، تؤکمک صیدلر قانین،
یئتیرمک کبک و دراج و تزروه شهپر آوازی.

آلاندان سونرا صیدین شاد میل آشیان ائتمک،
نچون کیم، فتح ائدیب مُلک فرنگی خسرو قاضی.
صفا و ذوق ایله میل نگارستان روم ائتمیش،
خلافت تختینی مستخدم فیض قدوم ائتمیش.

زهی سلطان روشن رأی، مُلک آرای دریا دل
کی، توفیق ظفر اقباله قیلمیش جوهرین قابل،
بینای اهتمامیندان دمادم اولماسا محکم،
طلسم دین حق طغیان کفرایله اولور باطل.
علو اقتداریندان پیاپی بولماسا رونق،
اولور نقش سعادت صفحۀ ایامدان زایل.
شه دنیا و دین سلطان سلیمان شاهی عادل دیل
رضاسین ساخلایان هم دین، هم دنیا قیلیر حاصل.
حوادث دفعینه عالمده قادر پادشاه اولدیر،
پناه ایسترسه، عالم، خسرو عالم پناه اولدیر.

حریم حق چراغی، سلطنت شمع شبستانی،
ریاض عدل سروی، اوج رحمت ماه تابانی،
خلافتده ولایت اهلی نین همتلی سرداری،
ولایتده خلافت تختی نین دولتلی سلطانی.
سکندر تختی نین اقبال ایله مقبول داراسی،
سلیمان ملکونون اثبات ایله وارث سلیمانی.
ملاز مملکت، ممدوح ملت، مظهر رحمت،
هر آفت دفعی، هر غم چاره سی، هر درد درمانی.
شریعت زیوری، دین رونقی، اسلام آیینی،
مروّت منبعی، انصاف دریاسی، کرم کانی
کی، هر کیم هر دل ایله هر نه وصفین قیلسا، افزون دور،
اونا بنزر شهنشه گؤرمه‌میش تا دؤور گردون دور.

شاهنشاهی کی، گردون درگه قدرینه چاکردیر،
جمیعی مدعاسی فیض دولتدن میّسردیر.
نه فرمان کیم، قیلیرسا حق رضاسینه مطابق دیر،
نه یان کیم عزم قیلسا، بختینه توفیق رهبردیر.
فضای بارگاه عدلینین اعیان مقبولی
سراسر هر بیری عدلینه بیر پاکیزه مظهردیر.
مقدم جمله دن اول سرور صاحب سعادت کیم،
ازلدن طینتی انصاف و عدل ایله مخمردیر.
نظام العزّ و الاقبال سلطان ویس روشن دل
کی، دارالملک روم انوار عدلیله منوردیر.
کؤنول، وقت اولدی، اول قطب زمان دورونده اظهار ائت،
نه مقصد کیم، زمانلار باطن پاکینده مضمردیر.
عدالت طینتی نین طرزینی اول پاک تندن سور،
نبوت خرقه سی نین ذوقینی ویس القرندن سور.

شها، جنّت دیلردیم، حق میّسر قیلدی دیدارین،
اوماردیم نور رحمت، روز اولدی شمع رخسارین.
مرادیم کعبه ایدی، طوف درگاهین نصیب اولدی،
چکردیم لعل ایچون حسرت، ایریشدی سمعه گفتارین.
قیلیردیم آرزو حقدن کلید مخزن مقصود،
گؤروندو دیدۀ امیدیمه دست گوهربارین.
صفای طلعتین محو ائتدی کؤنلومدن الم نقشین،
معالج اولدی حاضر، قالمادی تشویشی بیمارین.
طریق عز و اقبالی ایتیرمیشدیم اولوب غافل،
منی غفلت یوخوسوندان اویاتدی بخت بیدارین.
نه طاعت اجریدیر، یا نه دعا تأثیریدیر، یا رب
کی، مطلوبی میّسر اولدی محنت سیز طلبکارین؟
فضولی حسن اطواریله اولموش قربونه مایل،
بودور تأثیری عالمده همیشه حسن اطوارین.
صفای نیت ایله یوخ دعا قیلماقدا تقصیری،
دعا اولسا ریا سیز، بؤیله دیر، البته، تأثیری.

بینای رفعتین تا دؤور گردون وار، وار اولسون!
مدار ائتدیکجه عالم، دولتین عالم مدار اولسون!
مقام ارتفاع قدرینه بیم حوادث دن
همیشه دولت توفیق حق حصن حصار اولسون!
سرای همتین کیم، خلقه سالمیش سایۀ رحمت،
اساسی نصرت و فتح ایله دایم استوار اولسون.
تمامی امورین هر جهتدن موجب تحسین،
جمیع خدمتین منظور عین اعتبار اولسون!
سن اولغیل ارجمند مُلک، دشمن قید غم چکسین،
سن اولغیل سربلند دهر، حاسد خوار و زار اولسون!
فضای بقعۀ بغداد عدلیندن اولوب روشن،
مزاج پاکینه آب و هواسی سازگار اولسون!
سریر حکم برج اولیا سندن بولوب زیور،
صفادن هر گونی نوروز و هر فصلی بهار اولسون!
سنین وصفینله گون گوندن تاپوب رونق منیم نظمیم،
منیم نظمیمله وصفین ورد اهل روزگار اولسون!
زبان اولدیقجا بیر دم گئتمه سین ذکرین زبانیمدن،
خیال خدمتین محو ائتمه سین حق لوح جانیمدن.