آرزو

ظۆلمتین توزونو سِحر الیله،
اۆرک آیناسیندان رفع ائده بیلسم!
وحشی گؤیرچین تک قانادلاناراق،
اوزاق اۆفوقلره آه، گئده بیلسم!

سیاه دالغالارین حلقه‌لرینده،
قاباران بیر کؤپوک، چؽرپینان اولسام،
غۆروب پرده‌سینده سولغون اولدوز تک،
گؤز یومار-آچان واخت، سارالیب سولسام...

تیترشن کؤلگه تک، بیرجه گؤرونسم،
ماوی پنجره‌نین بۆلور جامیندا،
بیر پاریلتی اولسام، یارین گؤزونده،
سؤنوک بیر نور اولسام اونون شامیندا!

بیر تبسّوم اولسام دوداقلاریندا
سولغون یاناقلارین قؽزیل گۆل ائتسم
بیر داملا یاش کیمی، آخیب گؤزوندن:
آطلاس اتگینده اریییب گئتسم...